Spread the love

 

Բոլորովին նոր է ան, և, բոլորովի՛ն մերը:

Մինչեւ հիմայ մենք գացինք, կամակոր, այն ճամբէն, ուր քշեցին տարին մեզ ընտանեկան և ընկերային հին հոսանքները:

Պատերազմը, իր տիտան աւերումներուն մէջ, ամէն բան քանդելով` ծնունդ տուաւ շատ մը սահմռկեցուցիչ թշուառութիւններու, որոնց հետ նաև ցանցառ բարիքներու: Այս վերջիններուն մէջ իր տեղը ունի կնոջ ձերբազատումը, ընկերային պայմանագրական տուիքներու ցանցերէն:

Այն դժոխային բոցերուն մէջ,- չո՛րս տարի-, մենք, կիներս, և մասնաւո՛րապէս Հայ կիներս, ամէնէն աւելի մեր արիւնը քամելով, նորէ՛ն բան մը շահած եղանք բարոյապէս: Ապացուցինք թէ` կրնայինք անցնիլ ամէն խորտուբորտի վրայէ, թէ` կրնային վստահիլ մեզի, տունէ, տեղէ, զաւակէ զատ, նաև գործ, նաև շուկայ. ապացուցինք թէ` այլեւս կրնային լռել բերանները` որոնք կը բացուէին անախորժ ու աննպաստ արտայայտութեանց համար մեր դատին մասին: Այդ ամէնէն դրապէս դուրս եկաւ որ, մենք ալ ատակ էինք մենէ վեր բաներ բաներ ընելու:

Երբ նկատի առնենք թե` ի՞նչ ըրինք մենք ընդհ. պատերազմի միջոցին, ի՛նչպէս փոխանորդեցինք մեր ամուսինները, մեր եղբայրները, մեր զաւակները, թէ` ի՛նչ ըրինք անկէ վերջն ալ, ի՞նչպէս  գրկեցինք մեր որբերը, ի՞նչպէս լացինք անոնց արցունքներուն մէջ, ի՞նչպէս փարեցանք մեր պարտականութիւններուն, անխուսափելի է որ չբարեփոխուի մեր ճակատագիրը:

Մեր ետեւը կթողունք արահետ մը, որ թեև ոչինչ ունի տօնական կամ փայլուն, բայց արահետ մըն է, որուն` չամչնալով կը նայինք, գիւղի պարկեշտ արահետ մը, որուն վրայէն անցեր ենք կատարելով մեր պարտականութիւնները իբր կին, իբր ամուսին և իբր մայր: Հիմայ, այս ուղին պէտք է հարթենք. Պէտք է ընենք զայն քաղաքի լուրջ ճամբայ մը, աւելի՛ լայն, և աւելի ձի՛գ դէպի նպատակը: Այդ ճամբուն վրայ մենք պիտի կռենք մեր պարտքերը, պիտի ստեղծենք մեր իրաւունքները, պիտի դարբնենք մեր գործը, որ` ամենեւին չհեռացնելով մեզ մեր կնոջական բնազդներէն, մեր տունէն` պիտի տանի դէպի բարձունք մը, ուր հասնիլ կը մղեն մեզ մեր սեռին, մեր ցեղին և մեր հայրենիքին վերածնունդի ջղապիրկ սարսուռները:

«Հայ կին» (Կ. Պոլիս), 1919, թիւ 1


Spread the love

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով

This site uses Akismet to reduce spam. Learn how your comment data is processed.